Dei er ustaduge og skiftande
dei nye krava
til biblioteksektoren

Den nye sanningi
vil òg få konsekvensar
for bibliotekuppgåva

Korleis fær vi
det rette materialet
i framtidas ustaduge og skiftande røyndom?

For å vera bibliotekarar
i den nye røynda
må me vera duktuge!

Digitale
informasjons-
og kunnskapsreservoar

Kvifor hev vi eit bibliotek?
Kvifor hev vi nyttarar?
Kvifor hev vi bibliotekarar?

Vi må hugsa
at valet til bibliotekaren
berre er eit av fleire val

Vi må òg hugsa
at ikkje alle nyttarane
kan lesa samisk

Det krusiale
springande punktet
på ein bibliotekkonferanse
er eit solid reservoar
av batteri
til mp3-spelaren

Vi gjekk yver
frå standardar til retningsliner
i IFLA
for at biblioteka skulle slippa
å fylgja upp

So kjem han sigande
seminardunsten
svovelhaldug
som frå egg
truleg frå lunsjen

Ingen kan veta
kven som er skuldug
og lufta
er for alle
og ingen

Jag har en faster
i Örebro
som e bibliotekarie

Folkebiblioteket -
ein kollektivfil på
informasjonssuperhøgsnøggleiksvegen

Tilslutt
denne måndagen
vil Kommuneforbundets uppljosingssekretær
skilja ut
uppljosande sekret

På benken føre meg
sit ho Trude
frå Harstad

Blafrar med flybillettane
medan det talast um apotekarfagets
nye kompetansekrav

I firetida dreg ho
med flyet sitt mot Harstad
via Trondheim og Tromsø

Burt frå storbyen
seminar
umoral og utruskåp

Det er ei ny røynd
vi no ser konturane av
i apotekar- og farmasifaget

Ei ny røynd
der dei gamle røynslene
ikkje lenger vert verdsette

Slik er det
det nye millenniet

Birgitte
sit der òg
lest som ho ikkje hugsar meg

Men vi skapa magi der
på kanten av natta
på hotellrommet mitt

Eg gav ho det eg hadde
og lytta til fjoskene hennar
no gjeng vi kvar til vårt

Eg undrast
og ottast
kvar det vart av
mp3-spelaren
no i natt

Var det Trude som tok han?

Eg trudde
då eg gjekk i seng
at vi byrja att
til same tid

Slik vart det ikkje
so eg gjekk miste av
ei rad stadfestande
stadfestingar um apotekfaget

Når dagen er yver
og rusen er slutt
treff eg deim i foajeen

Alle deim eg hev sakna
like sidan i går
kor vart dei av?

Dei talar um kompetansekrava
til bibliotekarprofesjonen
og det byrjar å demra...