Du stod der med alle
overheadane
og dei utfyllande
notatane.

Messa.

Anorakken flagrar kring
hennar andlet av
stål.

Ho bur seg for å gå ut.

I mørkret ljoser
bileta over lerretet
alt medan draumane
flyg hjå konturane.

Som du sikkert veit.

Eg såg deg
ikkje idag.

Venta du
noko raudt i aust?

Nokre overheadar seier
meir enn du er
klår over.

(Men einstads inst
i hugen ligg
blåkopiane gøymt.)

I daudishola
låg alle draumane
gøymt.

No er draumane
vekk.
Men slagget ligg att.

Det tek tid
for kjenslene å flytta
seg frå hugen
til hjarta.

Som du sikkert veit.

Eg har vorte ein
fri mann.
Utan draumar og von.
Utan angst og
fjoske.

Men kva tyder dette?

Bak deg
eit monster som
freistar å skremme
meg unna.

Men kva veit
du om det?

Gjev du faen
i Korioli-verknaden,
seier du?

Eg ber deg: Ikkje gjer det.

Han kan gje deg svar
på det som du
ikkje undrast over.

Eg såg deg
i kjøpesentervrimmelet
i dag.

Eg vart ikkje
forvirra.

(Måtte berre skrive eit dikt.)

Sanninga
om kjærleiken
er at han
kjøvast.

Eg går
i ei tom gate.

(Kastanjane blomar ikkje
i februar.)

Minna
er for hugen
som barnåla
for jorda.

Som du sikkert veit.

Djupt i hugen
ligg det botnfrosne
hatet som berre
finn næring i
karrige podsol-profilar.

Nokon
vil perhaps seie at
dogg skuldast
at lufta har
nådd sitt
metningspunkt.

Du og eg -
Vi veit betre,
gjer vi ikkje?

Minerala gøymer
løyndomar som
hugen berre kan finne
når det regnar om
hausten.

Som du sikkert veit.

Tannlækjaren spurte meg
kva som var gale.

Eg sa eg mistenkte
at det gjekk føre seg
ein fjellkjedefalding
i tanngarden.

(Han hadde imidlertid
lita tru på kontinentaldriftsteorien.)

Bjørka lyttar til
sorga ho
bér i hugen.

(Ho lærer mykje av å gjera dette.)

Å, var eg
eit salatblad!

Kjærteikna
av varsamme hender
som veit korleis
hugen er stilla.

Kjensler:

Krystalliserte tankar
i ein straum av
altfemnande informasjon.

Lengst ute på Svartmyra
stend tiurhubroen
og syng sine songar
om angst
og noko som liknar
angst, men som er
noko anna.

Riktig mannevond er han.

For hugse det
bør vi:

For æva er
sjølv grunnfjellet
forgjengeleg.

Djupast inne
i hugen einstads
ligg vitskapen
om dei adiabatiske prosessane.

Eingong
må du
attende
dit inn.

I juratida
sprakk gamle einingar
opp.

Det vart avsatt
sedimentar som enno
gjev næring
til vona.